MCHUNGAJI LUTUMBA NA MKEWE WASIMIKWA KUWA MASKOFU NA SALESI MALULA

Mchungaji  Lutumba na mkewe wasimikwa kuwa Maaskofu

Na Salesi Malula

Hayawi hayawi sasa yamekua ndivyo ilivyokuwa siku ya jumapili ya tarehe 15 December 2013 ndani ya kanisa la Mlima wa Mabadiliko(River Of Life) ambapo watumishi wa Bwana Mchungaji David Lutumba na Mkewe Mary ambao wamemtumikia Mungu kwa muda wa miaka mingi na kazi yao kuonekana hatimaye wamesimikwa rasmi kuwa Maaskofu wa Kanisa la mlima wa mabadiliko Duniani.

Tukio la kusimikwa rasmi kwa maaskofu hao vijana lilifanyika Kanisani kwao Toangoma wilayani Temeke Jijini Dar es salaam ambapo maelfu ya waumini kutoka mikoa mbalimbali ya Tanzania wakiwepo watumishi wa Mungu kutoka nchi za Burundi,Kongo Zambia na Afrika ya kusini waliweza kuhudhuria sherehe hizo za kusimikwa kwa Viongozi wao tukio ambalo walikuwa wameliandaa kwa muda mrefu.

Katika sherehe hizo watu walionekana kufurahia sana tukio hilo hasa kutokana na kanisa lao kuwa limejiendesha kwa muda mrefu lakini lilikuwa limekosa Askofu jambo ambalo kwa sasa limefungua mlango kwa viongozi wao kuchapa kazi kwa bidii ili kazi ya Mungu isonge mbele na kukua zaidi ili maaskofu wengi waweze kusimikwa na kiongozi wao Mkuu ndani na Nje ya Tanzania.

Kiongozi Mkuu wa Kanisa la Hour Of Revival Askofu David Mathebula Kutoka Afrika ya Kusini Ndiye aliyeongoza shughuli nzima ya kuwasimika Mtume Mary na Mumewe David Lutumba maaskofu na viongozi wakuu wa kanisa la Mlima wa Mabadiliko Duniani.

Lutumba na Mkewe Mary ndio waanzilishi wa Kanisa la Mlima wa Mabadiliko kazi ambayo waliianza kwa ugumu ambapo hawakuwa na Fedha wala dhahabu zaidi ya kuwa na Yes tu aliyewawezesha kuisimamisha Kazi ya Mungu hadi hivi leo ambapo Mungu amewainua na kuwafanikisha kuwa na kanisa kubwa lililojengwa kisasa na lenye waumini zaidi ya elfu moja.

Makao makuu ya Kanisa la Mlima wa mabadiliko kwa Neema ya Mungu yapo Tanzania na kwa muda mfupi kanisa  limefanikiwa kufungua matawi mbalimbali katika maeneo ya Tabata Bima,Toangoma,Kibaha,na Morogoro kwa hapa nchini ambapo yote yanaendelea vyema,na Nje ya Tanzania  Mungu amewasaidia kufungua matawi nchini Burundi,Congo ,Zambia na mipango inaendelea kufungua tawi nchini Uingereza hii ni kwa Mujibu wa Askofu David Lutumba ambaye  alifanya mahojiano maalumu na gazeti la jibu mara baada ya kuimikwa rasmi.

Akieleza Historia ya Kanisa lake Askofu Lutumba alisema lilianza rasmi mwaka 2004 katika ukumbi wa anatoglo uliopo Mnazi mmoja wakiwa na waumi 15 ambapo walidumu katika ukumbi huo kwa muda wa miaka miwili na nusu ambapo walishindwa kulipa kodi ya shilingi elfu 20 kutokana na waumini waliokuwa nao kutokuwa na uwezo wa kulipa pango la mahali pa kuabudia hivyo ilibidi wahamie tabata nyumbani kwa mtu.

Hali ilikuwa mbaya zaidi kwani waumini walipungua na kuwa 7 kwani wengi walishindwa kumudu gharama za kufika tabata na kuamua kujiunga na madhehebu mengine yaliyo jirani.

Hatukukata tama tuliendelea na ibada zetu kama kawaida bila kujali idadi ya watu na kwa neema ya Mungu watu walianza kuongezeka ndio tukaamua sasa kutoka sebuleni na kuanza kukodisha ukumbi ambapo Mungu aliusaidia kanisa likakua na kukua hali iliyosababisha Neema kubwa ya kupata kiwanja chetu kikubwa na kufanikiwa kujenga Kanisa kubwa pamoja na Ofisi mbalimbali zikiwepo studio hivyo mpaka nasimikwa rasmi kua askofu kwakweli mimi na mke wangu tumetoka mbali sifa na utukufu tunampa Bwana anayetuwezesha.

Akiongea katika sherehe hizo Kabla ya kuwasimika Askofu Mathebula alisema Uaskofu ni jukumu zito linalotakiwa kujitoa zaidi kwaajili yaw engine “hivyo ninapokwenda kuwasimika siyo kwamba ninawapa cheo bali mnajitwika mzigo mkubwa zaidi wa kuhakikisha mnalichunga na kuliangalia vyema kanisa la Bwana na kulifikisha salama katika safari ya watu kwenda mbinguni hivyo nawapa changamoto nafasi hii ninapowasimika manaanza kazi rasmi na mnatakiwa kuchapa kazi zaidi kuliko hapo awali.

Mara baada ya mahubiri Askofu Mathebula aliwaongoza kwa kiapo maalumu mbele ya madhabahu ya Bwana na baadaye aliweza kuwapa Hati maalumu ya kiapo cha Uaskofu na mara baada ya kuwasimika na kutangazwa rasmi kuwa sasa Kanisa la Mlima wa  mabadiliko limepata maaskofu wa kuliongoza Kanisa hilo.

Wakiongea kwa unyenyekevu mara baada ya kusimikwa walilishukuru kanisa kwa maandalizi ya muda mrefu,na walimshukuru Askofu Mathebula kwa moyo wake wa upendo uliomfanya aache hata mazishi ya aliyekua Rais Mstaafu wa Taifa la Afrika ya kusini Mzee Nelson Mandela na kututanguliza sisi hakika Baba Askofu Mathebula wewe ni Mtu wa Mungu ambaye umetujali na kututhamini asante sana alisema Mtume na Askofu Mary Lutumba kwa unyenyekevu huku Mathebula akionyesha kuguswa na shukrani hiyo kwa kutikisa kichwa.