MABINA AZIKWA KESHO

VILIO na simanzi kubwa, jana viligubika katika mazishi ya mtoto mdogo, Teneli Malemi

Mang’ombe (11), aliyeuawa kwa kupigwa risasi na mwenyekiti wa zamani wa CCM Mkoa wa

Mwanza, Clement Mabina.

Mazishi hayo yalifanyika nyumbani kwa marehemu Kitongoji cha Kanyama, Kata ya Kisesa

wilayani Magu mkoani hapa.

Katika ibada ya mazishi hayo iliyoongozwa na Paroko wa Parokia ya Bujora Kisesa, Padri

Fabian Mhoja, akisaidiwa na Katekista wa Parokia hiyo, Faustine Lucas, ilihudhuriwa na

viongozi mbalimbali wa CCM na CHADEMA na serikali wakiongozwa na Mkuu wa Wilaya ya

Magu, Jacqueline Liana.

CCM washukuru kutotimuliwa msibani

Akitoa salamu za chama mara baada ya kumalizika maziko ya mtoto huyo aliyekuwa akisoma

darasa la sita Shule ya Msingi Kanyama, Katibu wa CCM Mkoa wa Mwanza, Joyce Masunga

alisema: “Tulishtushwa sana tuliposikia tukio hili. Lakini tunashukuru wazazi, ndugu na jamaa

hamjatufukuza kwenye msiba huu.”

Katibu huyo mbali na kutotoa rambirambi ya fedha, alijivunia chama chake kuandaa chakula

msibani hapo, na yeye kuosha mwili wa marehemu Taneli kwenye chumba cha kuhifadhia

marehemu hospitali ya Bugando.

“Kwa niaba ya chama tawala cha CCM, ninashukuru sana familia ya marehemu maana

hamjatufukuza katika msiba huu. Ingekuwa sehemu nyingine tungeweza kufukuzwa kwa sababu

kiongozi wa CCM amehusika kuua. Ila naomba sana tuweni na upendo, uvumilivu na amani,”

alisema Masunga huku akipiga magoti.

Mkuu wa wilaya hiyo, Jacqueline Liana alisema: “Kila mtu asimamie amani. Tukio kama hili

lisitokee tena katika wilaya yangu hii ya Magu, na ikiwezekana liwe la kwanza na la mwisho

kote nchini. Na Serikali ya Magu inatoa pole ya rambirambi kwa familia ya marehemu ya sh

300,000.”

Taneli aliuawa kwa kupigwa risasi na Mabina kisha nae kuuawa na wananchi papo hapo,

Desemba 15 mwaka huu, katika ugomvi wa mashamba kati yake na wananchi wa Kanyama.

Mazishi ya Mabina yawa gumzo

Wakati huo huo, Mabina ambaye alikuwa diwani wa Kata ya Kisesa wilayani Magu na mjumbe

wa mkutano mkuu wa taifa CCM aliyeuawa na wananchi wenye hasira, anatarajiwa kuzikwa

kesho, ambapo mazishi yake yatagharimu sh milioni 22.

Tetesi zilizopatikana kutoka kwa baadhi ya waombolezaji nyumbani kwa marehemu Mabina,

zinaeleza kwamba, Rais Jakaya Kikwete huenda akaongoza mazishi ya kiongozi huyo.

Baadhi ya wananchi wa Kisesa walionekana kufurahi kuuawa kwa kiongozi huyo, kwa madai

kwamba alikuwa amewasumbua kwa kuwadhulumu mashamba kwa muda mrefu.